ALFEIRÁN RODRÍGUEZ, XOSÉ / ROMERO MASIÁ, ANA
Os actuais estudos de bacharelato están rexidos pola Lei Orgánica 3/2020, do 29 de decembro, pola que se modifica a Lei orgánica 2/2006, do 3 de maio, de Educación, xuntamente co Decreto 157/2022, do 15 de setembro, polo que se establecen a ordenación e o currículo do bacharelato na Comunidade Autónoma de Galicia.
Neste contexto, o segundo curso de bacharelato ten unha connotación especial pola súa vinculación coas probas de acceso á Universidade. O novo modelo destas probas aínda non está definitivamente establecido, polo que nos movemos nunha situación de transitoriedade na que convén ir adaptando, tanto os materiais curriculares como os métodos do profesorado e do alumnado para afrontar un modelo de exame baseado, non tanto na aprendizaxe de contidos como na capacidade de abordar algún dos aspectos relacionados cos obxectivos ou competencias específicas de cada materia.
Para o caso da materia de Historia de España, e tendo en conta esta situación de cambio de modelo nun futuro próximo, optamos por presentar os contidos organizados por unidades temáticas na nosa liña habitual, pero tamén uns modelos, a modo de exemplos, de como poder abordar unha proba na que o alumnado teña que demostrar que adquiriu as competencias establecidas no currículo da materia. Deste modo, nas páxinas finais, preséntanse unhas opcións de como presentar uns materiais cos que traballar a longa duración por cada un dos obxectivos da materia de Historia de España.
Como estratexia de ensinanza-aprendizaxe, defendemos un que combina a aprendizaxe por recepción e por descubrimento. Así, a presentación dos contidos conxuga a información explícita para comprender os desenvolvementos dos feitos históricos coa reconstrución e verificación de parte da información por parte do alumnado mediante a lectura e comentario de numerosos documentos históricos que aparecen integrados no texto.
Por último, destacar a incorporación importante do papel da muller na conformación da nosa historia, nunha necesaria visibilización pendente.
